“Cari” i Rusisë, Putin betohet si president

Botë Rrotull

Gjurma 7 Maj

Rusia është “sy e veshë” nga ceremonia e betimit të Vladimir Putinit, për një mandat të katërt 6-vjeçar si president, pas fitimit të zgjedhjeve në muajin mars.

Ai është në pushtet prej 18 vitesh, qoftë si president, ashtu dhe si kryeministër, ndërsa kundërshtarët e tij e krahasojnë qëndrimin e tij me mbretërimin e një cari apo perandori.

Policia u konfrontua me protestuesit kundër sundimit të tij në Moskë dhe qytete të tjera ruse gjatë së shtunës. Më shumë se 1.000 vetë u arrestuan në demonstratat e mbajtura në 19 qytete.

Betimi i tij në Kremlin, edhe pse është raportuar të ishte më pak pompoz sesa ai i vitit 2012, sërish nisi me parakalimin e limuzinës së tij mes rrugëve të boshatisura të Moskës dhe kalorësit në anë të rrugëve.

Ankesa më e madhe mes rusëve, sipas një sondazhi të “Levada Centre”, është se Putin ka dështuar të reduktojë hendekun e pasurisë, ndërsa një ankesë më e vogël është dështimi për të rifinancuar rusët që humbën kursimet e tyre gjatë reformave të tregut.

Ndërkohë, arritja më e madhe e lavdërueshme e Putinit është rikthimi i statusit “fuqi botërore” për Rusinë, sipas të njëjtit sondazh. Ai është zhvilluar muajin e kaluar me 1.600 të anketuar në 136 qytete.

Putin u zgjodh president me mbi 76% të votave, performanca më e mirë historike e tij, por parregullsi të mëdha u raportuan nga vëzhguesit ndërkombëtarë.

Gjithsesi, kur të përfundojë mandatin e tij të katërt, në vitin 2024, ai do të regjistrojë qëndrimin në pushtet prej afro një çerekshekulli (24 vite). Kjo e bën atë vetëm të katërtin në radhë, pas diktatorit sovjetik Joseph Stalin, me 31 vite në pushtet, si dhe mbretërimeve të carëve rusë si Alexander II (26 vite) apo Nicholas I (30 vite).

Rusia është ende duke u përballur me sanksione Perëndimore për shkak të rolit të saj në konfliktin në Ukrainë dhe ndërhyrjen në politikën amerikane.

Zëdhënësi i Kremlinit, Dmitry Peskov ka thënë se Putin planifikon zhvillimin e një varg takimesh pas ceremonisë së betimit dhe nuk do të luajë hokej mbi akull, siç ka bërë pas ceremonisë së vitit 2012.

Putin, 65 vjeçar ka qenë ushtrues detyre i presidentit në ditën e fundit të vitit 1999 dhe nëse numërohet periudha e tij si kryeministër më 2008-2012, ai është lideri me më së shumti vite në pushtet prej pushtetit të diktatorit sovjetik, Josef Stalin.

Ai ishte rizgjedhur në muajin mars me 76.69 përqind të votave, më shumë se që kishte fituar më 2000, 2004 dhe 2012 dhe ishte konsideruar me përqindjen më të madhe të siguruar nga ndonjë lider rus të periudhës post-sovjetike.

Ndonëse ka pasur raportime për parregullësi në zgjedhje, duke përfshirë 10 milionë vota false, ato nuk duket të kenë ndikuar në popullaritetin e Putinit.

Kundërshtarët e tij kanë thënë se kontrolli i rreptë i Kremlinit dhe media shtetërore i kanë siguruar atij fitoren pavarësisht se vëzhguesit ndërkombëtarë kanë thënë se votuesit nuk kanë votuar në mënyrë të sinqertë.

Megjithatë, bazuar në të dhënat e një organizate shtetërore VTsIOM, besimi i rusëve për Putinin ka rënë dukshëm prej kohës së zgjedhjeve, nga 58.9 përqind sa ishte në muajin janar në krahasim me 47.1 përqind në muajin prill.

Por kush është Putin, spiuni i bërë president? Le ta ndjekim shkurtimisht:

Viti 1952: U lind më 7 tetor në Leningrad (sot Shën Pjetërburg), qyteti i dytë më i madh i Rusisë, studioi për drejtësi dhe iu bashkua policisë sekrete KGB, duke shërbyer si një spiun në Gjermaninë Lindore.
Në vitet 1990: Pasi shërbeu si ndihmësi më i lartë i kryebashkiakut të Shën Pjetërburgut, iu bashkua Boris Yeltsinit në Kremlin në vitin 1997, ku u bë shef i FSB-së, (pasardhëses së KGB-së).
Viti 1999: U emërua kryeministër, por shumë shpejt u bë president në detyrë pas dorëheqjes së Yeltsinit.
Viti 2000: U zgjodh president dhe shërbeu për dy mandate 4-vjeçare.
Viti 2008: I ndaluar për të garuar për një mandat të tretë, tronditi analistët me rikthimin në postin e kryeministrit, ndërsa besniku i tij Dmitry Medvedev u bë president.
Viti 2012: U rizgjodh president për një mandat 6-vjeçar, bazuar mbi ligjin e ri.
Viti 2018: Rizgjidhet sërish për mandatin e katërt, edhe ky 6-vjeçar.

Loading...

Leave a Reply

Your email address will not be published. Required fields are marked *